Pritil Public Market sa Tondo dinumog bago magpatupad ng ‘hard lockdown’ sa lugar

Dinumog ng mga mamimili ang Pritil Public Market sa Tondo Maynila, isang araw bago ipatupad ang ‘hard lockdown’ sa Tondo.

Batay sa mga ulat, dinagsa rin ng mga mamimili ang ilan pang pamilihan sa Tondo dahil sa implementasyon ng hard lockdown sa Tondo, Maynila.

Epektibo ang hard lockdown simula Mayo 3 hanggang Mayo 5.

Ayon kay Manila City Mayor Isko Moreno, isasara ang buong Tondo, Maynila simula 5:00 ng umaga sa May 3 hanggang 5:00 ng umaga sa May 5.

Ito ay upang bigyang daan ang disease surveillance, testing and verification pati na ang rapid risk assessment.