Cebu City – Nagsugod na ang National Bureau of Investigation o NBI 7 pag-review sa mga dokumento gikan sa lainlaing buhatan sa  PhilHealth o Philippine Health Insurance Corporation sa Central Visayas aron pagsusi sa giingong pangurakot.
Si Atty. Renan Augustus Oliva, director sa NBI-7, miingon nga nakiglambigit na sila sa Coa o Commission on Audit sa pag-analisar sa nahipos nga impormasyon sa dili pa iduso ngadto sa  ulohan nilang buhatan.
Apan gitataw ni Oliva nga nakaduso na silag pasiunang dokumento gikan sa district office sa PhilHealth sa Bohol ug Dumaguete City.
Matod pa ni Oliva, naay mga ospital nga adunay mga claim busa ila kining gisusi.
Sa nasayran, niadtong ikaduhang semana sa Agosto gihulma sa NBI ang task force nga moimbestigar sa pasangil sa giingong anomaliya sa ubang buhatan sa PhilHealth.
Atol sa imbestigasyon, gitahasan usab ang NBI pagsubay sa lifestyle sa ubang opisyal ug kawani sa ahensiya.
Ug aron pagbaton og tin-aw nga picture sa cash disbursements sa ahensiya, si Oliva mitug-an nga ilang gitan-aw ang mga papeles sa ahensiya niadtong wala pay pandemic ug karon nga naa nay pandemic. (Jhon Tadlip/JTY)
(Source: National Bureau of Investigation 7)