General Santos City – Andam na ang yuta ug building sa laraw nga pagmuntar og Police Sub-station ilalum sa pagdumala sa Makar Police Station ning dakbayan sa GenSan. Mapalgan kini sa Purok 18 (Lanton), Brgy. Apopong, General Santos City isip bunga sa pagpursige nila Kapitan Jose Paolo Jude Natividad ug Kagawad Perfecto Lacea Jr.
Ang luna diin takda imuntar ang naasoy nga Police Sub-station gidonar ni Mr. Millado Paglangan ug sa pamilya niini. Gani, niadtong mi-aging buwan sa Abril 2023 pa nakita personal ni Gensan City Acting Police Director, Col. Jomar Alexis Yap ang gi-donar nga luna lakip pa building nga gipasalamat pag-ayo sa maong Koronel.
Matud ni Col. Yap, kini pa ang labing unang higayon sa kasaysayan sa Gensan nga adunay mihatag o midonar og yuta ngadto sa PNP-GenSan isip Police Sub-station. Sigun sa maong Opisyal, kung sa ubang lugar sa GenSan naglisod sila sa pagpangita og yuta, lahi matud pa sa Brgy. Apopong, tungod gi-plano pa lang nila sa Gensan-PNP, gihimo na sa maong Barangay. “Sa Iba nahihirapan kami maghanap ng donation ng Lupa. Sa Barangay Apopong pinaplano pa lang ginawa nyo na.” Ang pamahayag ni Col. Yap.
Pero awtomatiko matud pa unya mahimong Police Station No.12 ang naasoy nga Police Sub-station, hilabi na kung mogawas sa latest population survey sa National Police Commission (NaPolCom) nga kwalipikado ang PNP-Gensan nga magdugang og laing 2 ka Police Station. Kung mahinayon, gila-uman nga sakop unya sa Police Station No.12 ang Brgy. Apopong ug Brgy. Sinawal nga posebling matuman sa hingpit ayha matapos ang buwan sa Mayo 2023.
(News & photo courtesy of BLGU-Apopong)