Muling iginiit ng ACT Teachers Partylist na ibasura na ang planong pagbuhay sa mandatory Reserve Officers Training Corps (ROTC) para sa Grades 11 at 12.
Ito’y matapos ang pagkamatay ni 4th Class Cadet Darwin Dormitorio dahil sa hazing.
Ayon kay ACT Teachers Rep. France Castro, hindi na dapat pang ibalik ang ROTC lalo na at plano pa itong gawing mandatory.
Hindi aniya malabong may maganap din na hazing sa ROTC.
Nasawi si Dormitorio matapos umanong dumaing ng pananakit ng tiyan at walang tigil na pagsusuka.
Lumabas sa medico-legal report na ‘blunt trauma’ ang naging sanhi ng pagkamatay ng kadete dahil sa hazing.