Cebu City – Mipadayag og suporta sa limitadong pagbalik sa face-to-face nga klase ang mga mayor sa probinsiya sa Sugbo.
Pinaagi sa resolusyon pinetsahan og Oktubre 30, ang League of Municipalities o LMP Cebu Chapter miawhag sa Department of Education o DepEd Cebu paghatag og tin-aw nga polisiya o sumbanan sa limitadong face-to-face classes.
Suma pa sa porsiyon sa resolusyon, dili supak sa LMP Cebu sa maong lakang basta mohatag ang DepEd og tin-aw nga guidelines alang sa kahilwas ug kaluwasan sa mga estudyante, ginikanan, magtutudlo ug ubang stakeholders.Ang duha-ka-pahina nga dokumento pirmado ni Mayor Lakambini Reluya, kalihim sa liga ug ni Mayor Christina Frasco sa Liloan, presidente sa liga.
Migawas ang baroganan sa LMP-Cebu human isugyot sa DepEd atol sa miting sa mga mayor ang limitadong face-to-face nga klase sa mga dapit nga minos o wala nay kaso sa Covid 19 aron mogaan-gaan ang hagit nga hatod sa distance learning.
Nag-ingon ang LMP nga lakip sa mga challenges nga natuki sa miting mao ang societal impact sa bag-ong paagi sa pagtuon ug ang epekto niini sa pangutok sa kabataan, dakong gasto ug kahasol sa pagpaimprinta sa mga modules, hinay nga signal sa telepono ug internet connection, kakuwang sa mga gadget ug device, kalisod ug kawalay lugar sa ubang ginikanan pagtabang sa mga tinun-an pagtubag sa module tungod sa kahimtang sa ilang panimalay, ug kawalay klaro kon masabtan ba sa mga bata ang ilang leksyon kay wala man lagiy magtutudlo nga nag-agak sa ilang inadlawng pagtuon. (Jhon Tadlip/JTY)
(Source & Photo: League of Municipalities of the Philippines – Cebu Chapter)