Pito Ka Purok Sa Brgy Hilltop Nakapahimulos Sa Mga Ayuda Sa Kagamhanang Lokal Sa Dapitan

Dul-an 400 ka mga pamilya gikan sa pito ka mga purok sa Brgy. Hilltop sakop sa dakbayan sa Dapitan maoy nakapahimulos sa nagkadaiyang ayuda nga gihatud sa kagamhanang lokal.

Gitunol ang mga ayuda nga “555” food packs lakip na mga school supplies alang sa mga kabataan diin malipayon nga gidawat sa mga residente sa purok Orchids, Basak, Gabi, Saging, Marang, Lanzones ug Durian.

Nagkanayon pa si Kagawad Ramil Galleposo nga bulahan ang mga residente sa ilang barangay sanglit gidala mismo sa ilang tugkaran ang mga hinabang nga gikan sa pangagamhanan.

Gipasalamatan niini og dako si Mayor Rosalina Jalosjos, Cong. Romeo “Kuyajon” Jalosjos ug kanhi kongresista Seth Frederick “Bullet” Jalosjos lakip na sa mga nagpaluyo sa nasangpit nga programa.

Mipaabot usab sa iyang dako nga kalipay si Marcelina Ig-agaw, 68 anyos, ug nanimuyo sa Purok Marang sa administrasyon ni Mayor Nene nga nakataba’g dako sa ilang ginagmay nga pangunsumo ang 5 ka kilo nga bugas, 5 ka sardinas, ug 5 ka noodles lakip na mga school supplies nga magamit sa mga kabataan.

Kahibaluan nga ang maong programa sa inahan sa syudad nga si Mayor Nene wala magpihig sa mga hatagan ilabina gyud wala maglantaw sa bulok sa pulitika sanglit dili panahon sa pamulitika ang nasinati nga pandemya karung panahona. (CHAI)