Mikanaog na sa moderate risk ang healthcare utilization rate (HCUR) sa Cagayan de Oro.
Sa daily presser kagahapon, gikalipay ni Mayor Oscar Moreno nga anaa na lang sa 53.51 percent ang average HCUR sa syudad.
Miubos na usab ang isolation bed occupancy nga anaa na lang 45.75 percent, lakip ang paggamit sa mechanical ventilators nga anaa na lang 44.68 percent.
Apan, nagpabilin nga high risk pa gihapon ang ICU bed occupancy nga anaa sa 70.11 percent.
Samtang, mitungtong na sa threshold ang average daily attack rate kon ADAR sa syudad nga anaa sa 7.19, ug nagpadayon usab sa pag-ubos ang two-week growth rate nga anaa sa -44 percent.
Sa iyang kabahin, kusganon gihapon ang panawagan ni Mayor Moreno sa katawhan nga dili mag-kompyansa tungod kay ang virus anaa pa sa palibot, ug naghulat lang sa oportunidad nga makatakod.
Aghat pa sa mayor nga pahugtan kanunay ang depensa sa kaugalingon pinaagi sa pagsunod sa minimum public health standards, ug magpabakuna aron adunay igong proteksyon kontra Covid-19.
(Source: City Hall Public Briefing)