Pista Turismo Gisaulog Duyog Sa Tourism Month

0
145

“Pagpatunhay sa Industriya sa Turismo Mao Ang Sumbanan sa Pagbangon” mao kini ang  tema isip pagsaulog sa Pista Turismo de Dapitan karong semanaha.

Nasayran nga gibutyag ni Dr. Jose Rizal kaniadto nga gikumpara niini ang nagkalain-lain nga mga pagkaon samtang nagbiyahe siya sa mga lugar ilabina sa nasud sa Europa.

Sa paghidangat niini sa dakbayan sa Dapitan, natilawan niini ang mga lumad apan lamian nga mga pagkaon diin si Faustino “Tanong” Alfon nga usa ka Sugbuanon ug kusinero ni Dr. Rizal sa Talisay, Dapitan namahayag nga gusto ni Rizal ang tulo ka klase nga pagkaon nga iserbe sa talad-kan-anan nga mao usa ka sud-an nga sinigang, usa ka Espanyol nga sud-an ug usa ka mestizo nga putahe.

Tungod niini, ang City Tourism Office sa dakbayan nagpasiugda sa indigay nga Kaluto ni Rizal Cooking Competition o “Rizal’s Favorite Dish in Dapitan” diin adunay mga pinili nga resipe sama sa Chili Miso Soup, Sauteed Mung Bean ug Salted Milkfish nga gisalmutan sa unom ka mga grupo gikan sa Women’s Sidlak sa Brgy. Banonong; Women’s Association sa brgy. San Pedro; Susan Eatery sa brgy. Bagting; Music Industry sa syudad; K2M Kitchenette sa brgy. Polo; ug Barbecue Vendors Association sa syudad.

Sa maong kompetisyon adunay sukaranan nga gisumban sa mga maghuhukom nga sila Resident Chef sa DMC HRM Department Froilan Jamito Sr., World Cuisine Chef Efren Flores nga kasamtangang Chef ug Resort Manager sa Dakak Park and Beach Resort, ug City Nutrition Action Officer sa kagamhanang lokal nga si Eva Sagario.

Migawas nga mananaug ang Barbecue Vendors Association nga sila Norman Morgia ug Jovelyn Maygon diin ilang gipasalamatan ang buhatan sa turismo nga gihatagan sila’g kahigayonan nga mapakita ang ilang abilidad sa paglugo sa nagkalain-laing klase sa sud-an.

Gibutyag ni City Tourism Officer Apple Marie Agolong nga dili lamang dinhi kutob ang mga kalihukan sa syudad nga konektado sa turismo apan daghanan pa sama sa paghimo sa mga kan-anan alang sa talaba, kasag ug pasayan nga tukma usab atol sa pagpalambo sa boulevard ug paghan-ay sa mga stall.

Mihatag usab og mensahe si Museum Guide NHCP Albert Vincent Barreto nga ang Dapitan buhong sa natural nga produkto ug abunda sa bangus mao nagpasalamat siya nga gihatagan og importansya ang paghandum sa paghidangat ni Dr. Jose Rizal diin ang mga recipe sa pagluto mao ang iyang mga paborito.

Mitambong usab ang Presidente sa Hugpong sa mga kabatan-onan nga si Joseph Ryan Agolong kinsa midayeg sa mga misalmot ug nagpasiugda sa nahisgutan nga kompetisyon.

(News and photo courtesy of CITY INFORMATION DIVISION-CID-Dapitan Facebook page)

LEAVE A REPLY

Please enter your comment!
Please enter your name here