Pipila mga establisemento ang nasapon sa Regulatory Compliance Board (RCB) nga nagpadayon pag-operate taliwala sa mga gabayan nga gipatuman ubos sa MECQ diin temporaryo kining gipasirado tungod sa risgo sa pagtakod sa Covid19.
Lakip sa naisyuhan og Ordinance Violation Receipt (OVR) ang usa ka massage spa, Restobar nga misobra sa 10% capacity ang dine-in service, ug sari-sari store nga gipainom sa customers og nagbaligya sa ilimnong makahubog sa oras sa curfew.
Ubay-ubay ka mga massage spa ang gibisitahan usab sa RCB aron masiguro nga sirado kini tungod kay dako ang posibilidad sa pagtakod sa virus kung magpahilot ang mga kliyente.
Dugang niini, giadtoan usab sa RCB ang mga tindahan nga gi-reklamo sa mga residente tungod sa mga pagsupak nga gibuhat niini kalabot sa minimum public health protocols nga gihingusgan ubos sa MECQ.
Padayon nga ipahigayon sa RCB, pinanguluhan ni Atty. Egay Uy, ang surprise inspection ug enforcement sa tibuok dakbayan aron mas maubsan pa ang kaso sa Covid19 sa dakbayan.
Ang maong operation gipahigayon sa RCB inubanan sa Cagayan de Oro City Police Office (COCPO), ug National Bureau of Investigation (NBI). (City Information Office – SPP, photos courtesy by Reynan Baylin)