Davao Region – Subling gipasaka sa Alert Level 2 sa COVID-19 ang pipila ka bahin sa Davao Region, sugod Abril 15 hangtod 30.
Sa bag-ohay’ng gipagawas nga resolusyon sa Inter-Agency Task Force for the Management of Emerging Infectious Diseases (IATF), lakip sa mga anaa sa Alert Level 2 ang probinsiya sa Davao de Oro; Davao del Norte; Davao del Sur; ug Davao Occidental ug laing 22 pa ka mga lugar sa nasud.
Ang maong resolusyon, gi-aprobahan miadtong Abril 14 nga gipirmahan ni IATF Chairperson and Department of Health Officer-in-Charge Maria Rosario Vergeire ug IATF Co-Chairperson and Interior Secretary Benhur Abalos.
Kahinumdumang ilawom sa Alert Level 2, ipatuman ang 50% nga kapasidad sa mga indoor nga establisyemento alang sa mga fully vaccinated nga mga hamtong ug 70% alang sa mga outdoor nga lugar.
Samtang, magpabilin usab sa Alert Level 1 hangtod Abril 30 ang Davao City; Davao Oriental; pipila ka lungsod sa Davao de Oro partikular na ang Mawab, Montevista, Nabunturan (Capital), ug New Bataan; Braulio E. Dujali, Island Garden City of Samal, Santo Tomas sa Davao del Norte; Padada sa Davao del Sur; ug Don Marcelino, Malita ug Sta. Maria sa Davao Occidental. (Camille Santos Naraga)
(Source: DOH Davao region)