Patay an isa ka pintor dihang misukol kini sa kapulisan nga nagserved nan search warrant. An suspect nakilay-an na si Ariel Eludo Ybañez, 54 anyos, minyo na jaon maghuya sa door 2 sa isa ka apartment sa Purok 13, Green Homes, Brgy. Luna, Surigao City.
Alas 11:20 kagabii Pebrero 26, 2021, an mga personahe sa Surigao City PNP ubos sa kamanduan ni Police Lt. Col. Christian Rafols II mipatuman sa Search Warrant No. 2021-09 na tag-issue ni Judge Maureen B. Feliza-Chua, 3rd Municipal Circuit Trial Court, Placer-Bacuag, Surigao del Norte sa kasong Violation of RA No. 10591 Comprehensive Firearms and Ammunition Regulation Act diha mismo sa idja taghuy-an. Paghidangat sa raiding team, nakabantay an suspect ug mibunot kini sa idja armas na caliber .45 dajon pusil ngadto sa kapulisan. Mibawos an mga police officers ug naigo an subject sa iyang lawas.
Human sa pagbasa sa search warrant ngadto sa asawa sa suspect, gisuhid sa kapulisan an kuwarto na didto nag okupar siya magtulganan. Nakita didto sa may tungtunganan nan papel sa may dingding an duha ka bondpaper nga dunay flag sa NPA sanan basahon alang sa “Mubong Kurso sa Katilingban ug Rebolusyong Pilipino.”
An SOCO gipangulohan ni Police Major Jerry Solis nakarecover sa mga ebidensiya sa gawas nan taghuy-an sa suspect: 3 ka basiyo sa bala sa 9mm pistol, 3 ka basiyo sa bala sa caliber .45 pistol, natabog sa canal na caliber .45 pistol (nahimutang sa tuo nga bahin kilid sa idja uyo diin didto nadajang an suspect), isa ka bala sa caliber .45 naka chamber load sanan isa ka bala sa caliber .45 suyod sa magazine, kuwarta sobra isa ka libo ka pesos, pistol holster sanan posporo. (RPN DXKS Surigao Exclusive report)