Iriga City – Kansilado na an gabos na aktibidad sa banwaan nin Baao, kasunod kan padagos na paglobo kan kaso nin covid 19 na ngunian igua ng 26 na kaso.
Ini an nagin pahayag ni Alcalde Jeff Besinio, kasabay kan kafiestahan ngunian na aldaw ni San Bartolome, an patron kan banwaan.
Alagad sigun sa saiya, nakansilar man an mga aktibidad kan banwaan, an pagtubod asin pagpa-gadye sa simbahan an dai man ibinabawal tanganing padagos na giyahan an gabos pasiring sa salbadong lugar.
Igua naman nin mga granular lockdown na ipinapa-utob an banwaan sa magkapirang sona sa barangay kun sain igua nin kaso kan covid.
An mga barangay na ini iyo an San Vicente, San Roque, san Francisco asin Buluang.
Mientras tanto, sibot man ngunian an local na gobierno sa mahiwas na contact tracing na tanganing maisolate an mga posibling nakasalamuha kan mga nagpositibo sa nasabing hilang.
Nagpasalamat pa man an Alcalde sa magkapirang mga persona na tinugutan sindang i-publikar an pangaran nganing makatabang sa contact tracing na pinag-gigibo ngunian.
(OIC Melvin Barayoga, RPN DZKI Iriga)
(Source: LGU Baao)