Gipahunong sa government- owned Phividec ang quarry operations sa lungsod sa Tagoloan, Misamis Oriental sa miaging adlaw. Si Phividec Administrator Jose Gabriel La Viña miisue sa cease and desist order sa upat ka quarry operators sa maong dapit nga mao sila si Nicodemes Achas, Chique Cosin, Manuel Sukarno Alvarez ug Salvador Fernandez. Silang tanang gihatagan sa lima ka adlaw aron sa paghawa sa dapit nga sila nag-quarry ug pagtangtang sa ilang mga ekipo.
Matud pa ni La Viña, ang nasangpit nga operators nakasupak sa one-meter rule nga limitasyon sa pagquarry nga gimando sa Department of Environment and Natural Resources o DENR. Segun sa survey, and Phividec nawad-an sa 70 ka hektarya nga luna sa ilang 3,000 ka hektarya area tungod sa pipila na ka tuig nga pag-quarry.
Gidugang pa ni La Viña nga dili na usab niya tugtan ang quarry operators nga mogamit sa dalan sa PHIVIDEC nga nangadaot na tungod sa mga dump trucks nga gigamit sa quarry operations.
Ang maong lakang gihimo sa Administrator sa Phividec alang sa kaayuhan sa mga residente ug industriya sa maong estado. (Phividec | Gin Serohijos, RPN DXKO CdO OIC)