Manamnama a sumangpet ti sabali pay a National Sports Association nga umay agensayo ditoy Ilocos Norte.
Inlawlawag ni Mr. Faivo Bartolome, sports consultant ti gobierno probinsial a kaap-aprobar ni Gobernador Matthew Marcos Manotoc iti Phil. team ti Sepaktakraw.
Segun kenkuana, inyawis ti gobernador iti immun-una a gundaway ti iyuumay panagensayo dagiti nadumaduma nga NSA’s ditoy probinsia kalpasan nga adda ti rakurak ti Phil. Sports Commission a dagiti NSA ket iti pagensaywanda iti probinsia a masapul a panagsagsaganada para iti Southeast Asian Games.
Impalgakna a nalpas metten ti panangbisitada iti lugar a pagensaywan ti nasao a team apaman nga inaprobaran ni Dr. Shirley Agrupis ti Mariano Marcos State University a mausar ti pasilidad ti unibersidad.
Kunana a maiyur-urnos laengen dagiti dokumento dagiti maseknan kangrunaanna iti PSC ken iti Regional Inter Agency Task Force wenno ti IATF ti rehion uno.
Innayon ni Bartolome nga iti agdama ket adda pay ti dua nga NSA a mangiyur-uray iti panangaprobar ni Gob. Manotoc iti iyuumayda panagensayo ditoy probinsia. (Ronald Domingo, RPN DZRL Batac Correspondent)
(Source: Provincial Government of Ilocos Norte)
