HUGOT ang suporta sa Department Of Labor and Employment (DOLE) sa programang panginabuhian sa kagamhanang probinsyal.
Mao kini ang mensahe ni DOLE Regional Focal & Bureau of Workers with Special Concerns (BWSC) Program Manager Mark Anthony Combong atol sa PIO live interview.
Ang informal sector maoy gipokusang matabangan sama sa Former Rebels ug Indigenous People ning lalawigan.
Sa ulahing ihap, duna nay kinyentos onse (511) ka mga former rebels ug siete sientos (700) ka mga lumad ang nahatagan og panginabuhian. Kini hiusahan usab sa Project ALIMA sa nasyonal.
Gilangkoban niini ang paghimo og handicrafts gama sa kawayan, pagtukod og tindahan, serye sa pagbansay, ug uban pa.
Samtang saludo ang DOLE sa tinguha ni Gov. Peter “Sr. Pedro” Unabia nga mapakunhod ang kapobrehon pinaagi sa paghatag og dugang kinitaan sa katawhan.
Sa laing bahin padayong nangtunol og suholan sa Tulong Panghanapbuhay sa Ating Disadvantaged/Displaced Workers (TUPAD) dinhi sa probinsya. Ning bulan sa Enero 2025, dunay dul-an singko mil (4803) ka mga benepisyaryo niini.
Kabahin kini sa tinguhang makubsan ang kalisod sa lalawigan subay sa SDPI Program ug PAGLAUM development agenda sa gobernador ubos sa mga letrang P ug L kon Participatory Governance ug Livelihood and employment thru industry development.