El personajes del Guardia Costera del Filipinas o Philippine Coast Guard (PCG) exitosamente ya salva con dos pescadores en peligro na mar del provincia de Zamboanga Sibugay, asegun con el the Coast Guard District Southwestern Mindanao (CGDSWM) del Jueves.
El CGDSWM nohay mas identifica con el dos pescadores, con quien ya salva del Martes na mar del municipio de Naga, Zamboanga Sibugay.
Asegun con el CGDSWM, el mga personajes del PCG na Zamboanga Sibugay ya conduci operacion de rescate despues el esposa del uno del dos pescadores ya reporta del Martes denoche na subestacion del Guardia Costera na Kabasalan, Zamboanga Sibugay, cay el su esposo y su compañero ta esta en peligro por causa de grande mareada y condicion del mar agitado na mar del municipio del Naga.
El mga personajes del PCG-Kabasalan, equipado con mas mejor comunicacion de radio que ya despelga el PCG na Zamboanga Sibugay, exitosamente ya salva con el dos pescadores maskin delicao el situacion na mar.
Con el dos salvao pescadores ya lleva na subestacion del PCG na Kabasalan y ya reuni con el de ila respetivo familiares.
Asegun con el CGDSWM, el dedicacion del PCG para asegura el seguridad del mga hente na mar es un testamento del de ila medidas proactivo. (B. Garcia)