Napalgang wala nay kinabuhi ang lawas sa usa ka 50 anyos nga Lalaki didto sa Laoy, Olingan dakbayan sa Dipolog mga alas 7:40 sa buntag Mayo 29,2024.
Ang patay nga lawas naila nga si Rolex Molina Calibo, 50 anyos, minyo ug residente sa Jasmin Villas, Olingan, dakbayan sa Dipolog.
Nasayran nga mga alas 7:40 sa buntag nianang adlawa nakadawat ug tawag ang CPS TOC sa Dipolog gikan sa usa ka concerned citizen nga nagtaho kabahin sa usa ka lawas nga nakit-an sa ganghaan sa usa ka pinuy-anan sa Laoy Olingan, dakbayan sa Dipolog (Taasin residence).
Gilayon dayun kini nga girespondehan sa mga personahe sa Dipolog City Police Station para ma-verify ang report.
Sa inisyal nga imbestigasyon, nasayran nga ang biktima nakit-an kaniadto nga buhi samtang nagpahigayon sa iyang morning walking/jogging routine.
Apan, pag abot sa mga alas 7:30 sa buntag sa samang petsa, usa ka duol nga residente, nga si John Martin Taasin 27 anyos, nakamata ug nakabantay sa lalaki nga nagbuy-od nga walay panimuot sa gawas sa iyang atubangan nga ganghaan,nga matod pa gidudahang posible kining gi atake sa kasingkasing.
Diha-diha dayun nanawagan si Taasin og tabang sa ubang mga residente nga milabay ug gipahibalo ang kabanay sa biktima.
Dali gilayon gihatod ang biktima ngadto sa Corazon Hospital Biasong,Dipolog, apan gideklara na kining dead on arrival.
Sa samang higayon, nakig-coordinate gilayon ang mga otoridad ngadto sa pamilya sa biktima, nga anaa karon sa Corazon Hospital ang patay nga lawas sa niini. (Medalyn U. Borja)
(Source: Dipolog CPS)