Usa ka patay na nga fetus ang napalgan sulod sa usa ka basurahan sa Jollibee Fast Food partikular na sulod sa comfort room sa mga babaye nga nahimutang sa Rizal Avenue, Brgy. Central, ning dakbayan sa Dipolog mga alas 9:41 sa kagabhion Marso 17, 2024.
Sa imbestigasyon, nasuta nga mga alas 9:36 sa gabii sa samang adlaw, usa ka empleyado sa fast food nga gihinganlan og Johaina Mangumpit, nagtrabaho isip utility personnel, nakamatikod sa talagsaong sagol nga mga butang sa ilawom sa basurahan samtang nangandam sa pagkolekta sa basura.
Gitawagan sa maong utility personnel ang ilang assistant store manager ug nangayo og tabang sa dihang ilang nahibaw-an nga adunay patay nga fetus (baby girl) sulod sa cellophane.
Ang mga personahe ning maong estasyonan nakig-alayon sa ZN Forensic Unit ug sa City Health Unit ning dakbayan alang sa saktong disposisyon.
Sa pagkakaron padayon ang imbestigasyon,aron mahibaw-an ang pagkatawo sa inahan o ang responsableng tawo nga nagbilin sa maong fetus sa maong dapit. (Medalyn U. Borja)
(Source: Dipolog CPS)
