Davao City – Usa ka lalaki nga nagsakay sa PUJ ang gipusil sulod mismo sa sakyanan samtang nagbiyahe paingon sa Mintal, Davao City.
Kung basihan ang nakit-ang Barangay Certificate sulod sa iyang pitaka, usa ka Benjamin Buan Sr., 37 anyos ug taga Ulas, Talomo proper ang biktima.
Nakit-an sa imbestigador sa kapulisan nga dunay igo sa bala ang likod nga bahin sa iyang ulo.
Sumala ni Henry Baylon, drayber sa jeep, misakay ang biktima gikan sa kanto Ulas ug pag-abot sa Catalunan Pequeño nakadungog siya nga dunay miboto apan wala siya masayod nga gipusil ang iyang pasahero.
Nakita sa katawhan nga naghigda ang biktima sa tunga sa jeep nga nagkadugo. Ang biktima nakasout ug blue nga sleeveless, naka shorts og maong ug dunay pula nga sling bag, ug nag sinelas og puti.
Sumala pa sa Team Davao Rescue nga mirespondi sa lugar nga ang biktima naginhawa pa sa dihang miabot ang ambulansya.
Nagsakay ang biktima sa PUJ nga dunay plaka number LWM—208 biaheng Mintal-Roxas ug ang Kapolisan padayon pa nga naghimo ug lawom nga imbistigasyon aron masayran ang ugat hinungdan sa pagpamusil ug kung kinsa ang suspitsado nga mipusil sa biktima.
(Team Davao Rescue | OIC Michael Manguhig, RPN DXKT Davao)
