Dako ang pagtuo nila ni konsehal Romeo Calizo ug Lordan Suan nga ang kakulangon sa parking area ang usa sa nakadugang sa problema sa trapiko dinhi sa syudad.
Sa milabayng tigom sa komite sa roads and traffic management, si Calizo nanawagan sa kadagkoan sa Roads and Traffic Administration (RTA), paghikay sa plano alang sa parking area dinha sa commercial business district (CBD) kon Divisoria.
Kini nunot sa tinguha nga maagni ang mga nanag-iya og bakanteng lote dinha dapit sa Divisoria nga magamit alang sa parking area, libre man o’ naay bayad nunot sa sugyot ni konsehal Suan.
Dili man nato mahatagan sa realty tax exemption apan mahimong malibre ang mga nanag-iya sa lote sa gipahamtang nga business ug regulatory fees sa dakbayan, pamahayag sa konsehal.
Sa iyang bahin, si Calizo miingon nga unta masugdan sa labing daling panahon ang programa tungod kay maminusan gayud ang problema sa trapiko kun matubag ang problema sa parking areas.
Makatabang na kini sa pagpagaan sa trapiko sa tibouk syudad, panapos ni Calizo.
(Sangguniang Panlungsod – CdeO)
