Inpakaamo ni Mr. Edwin Carino, mangidadaulo ti sustainable Development Center ti gobierno probinsial a karaman ti “fisheries” iti pinaisagana ni Gob. Matthew Marcos Manotoc nga “agriculture master plan”.
Inlawlawagna a daytoy ket gapu ta nakitada a maysa ti fisheries ken ti high value commercial crops wenno HVCC kadagiti rumbeng a maipalawa ditoy probinsia.
Imbatadna a napanunutanda daytoy iti immun-una a gundaway gapu iti nagbalin a dakkel nga epekto ti “rice tarrification law”.
Segun kenkuana , saan laengen a dagiti “fish pond” ken dadduma pay a pagpupukan ti maik-ikkan kadagiti an-anak nga ikan ngem uray payen dagiti waig ken karayan.
Kunana a dakkel ti naitulong ti nasao a ganuat kas ipamatmat ti kaadun dagiti lames a maal-ala iti karayan iti sakop ti Brgy. Navotas A ken B, Cataban, Pila, Caaoacan , Madiladig ken dadduma pay.
Innayonna a maysa pay kadagit makitana a rason nga umad-adun ti maal-ala a lames kadagiti nasao a lugar ti saanen a panagtuba wenno panagusar iti illegal a wagas ti panagkalap kadagiti nasao a barangay. (Rosita Cainggoy, RPN DZRL Batac Correspondent)
(Source: Provincial Government of Ilocos Norte)