Gutgutiguten ni Gob. Matthew Marcos Manotoc dagiti Local Government Units ditoy probinsia a mangiyalisto a mangisayangkat ti panagbakuna kadagiti masakopanda a lugar.
Inlawlawagna a babaen iti daytoy ket ad-adu pay a bakuna ti ipaay ti Departamento ti Salun-at.
Imbatadna a masapul ti sangsangkamaysa a panaggunay tapno al-alisto a magun-ud ti herd immunity a kasapulan para iti panangrugi ti baro a “normal” a panagbiag ditoy probinsia
Mainaig iti daytoy, inpakaammo ni OIC Provincial Health Officer Dr. Josephine Ruedas a dagiti LGU’s ti napusgan a mangipatungpal ti panagbakuna.
Imbatadna a ti laeng agbalin nga akem ti probinsia ket ti panangmonitorna iti panangipatungpal dagiti LGU’s iti panagbakuna.
Pakaseknan daytoy, inbunannagna a masapul ti panagparehistro dagiti kakailian nga agkalikagum a mabakunaan kadagiti bukudda nga ili.
Innayonna a saanen nga agawat pay ti Provincial Health Office ken ti Department of Health ditoy Ilocos Norte kadagiti agparehistro a kaprobinsiaan nga interesado a mabakunaan ti kontra COVID-19. (Irene Ringor, RPN DZRL Batac Correspondent)
(Source: Provincial Government of Ilocos Norte)