Cebu City- Nakahigayon ang usa ka pamilya sa brgy. Poblacion, Medellin, Cebu pagpatubo ug pagnegosyo ug oyster mushroom tungod sa pagpatuman sa ECQ o enhanced community quarantine sa lalawigan.
Si Rev. Randolf Bayo, 38, miingon nga ang bag-o niyang patigayon ang gihimo nilang tinubdan sa ilang mga panginahanglan ug pagtabang sa ubang sakop sa ilang simbahan – ang Life Builders Converge Church-Baptist Conference of the Philippines.
Giasoy ni Bayo nga sa sinugdanan nagsalig lang siya sa honorarium nga ihatag sa ilang simbahan alang sa ilang mga gamit sa balay.
Gitug-an sa pastor nga naa silay gisuholang sakop sa simbahan sa pagbisibis og tubig sa gipatubo nilang mga uhong.
Ang ubang kita nila sa negosyo ilang gipamalit og facemask nga giapod-apod sa mga membro sa simbahan ug sa pipila ka front-liners.
Ang pagtrabaho niya sa balay, nakahatag usab ni Bayo og higayon pagpakig-uban sa iyang asawa nga si Lory Jan ug tulo nila ka anak nga sila si Ish Jandyl, 14; Ish Jaryl, 8; ug Ish Janry, 6, nga miabag usab kaniya sa pag-atiman sa mushroom farm.
Gipahibawo usab ni Bayo nga nakat-on siya pagbuhi og uhong pinaagi sa economic enterprise training nga gipasiugdahan sa simbahan inabagan sa Engineering Support Battalion, 53rd Engineering  Brigade sa Phil Army sa Medellin niadtong Nobyembre 2019.