General Santos City – Hapsay ug malinawon ang kasaulugan sa kalag-kalag sa dakbayan sa Gensan. Kini ang gibutyag ni Police Col. Jomar Alexis Yap, Acting City Director sa General Santos City Police Office (GSCPO).
Pamahayag niya nga walay unsa mang naitala nga kriminalidad sa mga menteryo gawas nalang sa nahitabong kaso sa pagpamusil. Mas gamay usab ang mga niduaw sa menteryo kung itandi sa ilahang gilauman nga ihap kung asa dako ang nahimong epekto sa pag-ulan-ulan nga nasinatian.
Sa hisgutang trapiko, luag matud pa ang dalan pasulod ug pagawas sa Gensan, gawas nalang sa usa ka pribadong menteryo sa Barangay Apopong kung asa daghan ang mga na-traffic gikan sa South Cotabato human nga mas gihatagan ug prayoridad ang katawhan nga pagawas sa maong menteryo.
Dugang pamahayag ni Police Col. Yap nga human ang kalag-kalag aduna silay mga gipanglista nga kinahanglang i-improve sunod tuig.
Sama nalang sa mga menteryo nga kinahanglang hinluan ayha pa man ang adlaw sa kalag-kalag gumikan daghan ang mga nahadlok musulod sa posibilidad nga adunay mga bitin, adunay mga atop nga nanglupad ug uban pa, busa kini ang ilhang hatagan ug pagtagad.
Daghan usab sa mga nisulod sa mga menteryo nga PWD o mga senior citizen kung asa kinahanglan nga adunay available nga wheelchair aron matabangan ang mga nasangpit nga maka-abot sa ilahang mga kabanay nga nangamatay na.
Kalabot niini, gibutyag ni Police Col. Yap nga walay unsa mang naitala nga mga report nga adunay mga personal nga pagkabutang ang nangawala sulod sa menteryo o adunay mga gipangkawatan.
Nahimo usab nga epektibo ang ilahang panawagan nga dili magdala ug mga gipangbawal sama sa speaker, tanang matang sa sugal ug uban pa human nga walay nakumpiska ang otoridad.
Apan, giangkon niini nga adunay mga gipangsita ang kapulisan nga nagdala ug mga lagaraw nga gamiton unta mila sa pagpanghinlo.
(Source: GSCPO)