Cebu City – Nalangay ang proseso sa pagpagawas ug pondo sa birthday gift sa buwan sa Abril alang sa Senior Citizen, pondo sa vaccination program ug ang sweldo alang sa contract tracers.
Gipadayag ni Lapu-Lapu City Mayor Junard Chan ang iyang dakong pagka dismaya sa pipila ka sakop sa konseho nga wala mitunga sa regular session nga maoy usa sa mga hinungdan nga nalangay ang proseso sa pagpagawas ug pondo.
Matod ni Chan nga dako na unta kini nga ikatabang para pampalit og tambal, pagkaon o bisan unsa pang importanteng mga butang para sa mga katiguwangan.
Dugang ni Chan nga importante ang maong pondo alang sa vaccination ug ang sweldo unta para sa mga contact tracers nga mahinungdanon kaayo para mas mapadali ang pagbakuna ug mapildi na gayud ang virus.
Hinoon, nakasabot ang mayor sa duha ka mga konsehales nga sila si Atty. Rex Mangubat ug Atty. Bobit Hiyas kay aduna silay emerhensiya.
Iyang panghinaut nga unta ang ubang konsehales gitan-aw nila ang kabililhon sa matag programa nga gihalad para sa mga katawhan ug unsa kadako ang matabang niini para ilang seryosohon ang ilang trabaho.
Awhag niini nga dili isakripisyo ang katawhan sa panerbisyo.
Alang ni Chan nga kung unsay kaayuhan sa katawhan kinahanglan kining hugpongan ug tabangan.
(Jhon Tadlip/JTY)
(News & photo courtesy of Lapu-Lapu City Public Information Office)