Libre na ang pagkuha og health certificate sa probinsya sa Sarangani. Kini ang gibutyag ni Provincial Health Officer Doctor Arvin Alejandro aron dili malisdan pa ang mga katawhan kung mu-labigar sa probinsya.
Sa kagustuhan matud pa ni Governor Steve Chiongbian Solon nga dili na madugangan ang sakripisyo sa mga lumulupyo gumikan sa krisis nga nasinatian karon tungod sa Coronavirus pandemic, wala nay bayad ang pagkuha og medical certificate sa lima (5) ka municipal hospital sa Sarangani Province, lakip na sa Sarangani Provincial Hospital ug sa Provincial Health Office, apil pa ang opisina ni Doctor Butch Dulduco, ang DOH representative, suportado usab kini sa pito (7) ka municipal health office.
Gani, sa sesyon sa Sangguniang Panlalawigan kagahapong adlawa, adlaw nga Martes, pormal nga gi-aprobahan sa mga board member sa pagdumala ni Vice Governor Elmer De Peralta ang resolusyon alang sa pag-libre sa maong balayrunon.
Segun ni Board Member Joseph Calanao, ang chairman sa Committee on Appropriation, ang ilang pagpasa sa resolusyon ang resulta matud pa sa sentimento sa mga opisyales ug sa katawhang Sarangan aron ma-menus menusan ang mga galastuhan human nga halos mag-duha (2) ka bulan na ang gipatuman nga mga lockdown.
Niaging mga semana, gi-libre pud sa Kapitolyo sa Sarangani ang tanang bayrunon sa laboratoryo sa tanan niining pampublikong tambalanan aron dili mag-alanganin ang mga tao sa pag-adto sa ilang duol nga hospital kung adunay gibati sa lawas.
Gikinahanglan ang pagkuha og health certificate aron masiguro nga walay nasinatian nga mga sintomas. Apan dili compulsory ang pagpailalum sa Xray ug pagkuha og CBC sa dugo, depende na matud pa sa rekomendasyon sa doktor human sa physical examination kung nagduda kini sa kahimtang sa panglawas sa indibidwal nga nangayo og medical certificate.
Matud pa ni Doctor Alejandro, mapasalamaton ang local health department tungod nagpabiling COVID-free ang Sarangani Province, apan tungod giabrihan na ang mga piniling industriya, open na kini sa mga trabahante nga mga taga-Sarangani ug taga-gawas aron magpadayon ang ekonomiya ug panginabuhian, mas luwas matud pa kung ang masugata nga mga tao ang luwas usab sa mga sintomas. Mahitabo kana kung mukuha og health certificate.
Sa Executive Order No. 12 nga gipagawas ni Governor Solon, tugutan lang nga makagawas kadtong importante ug emerhensya ang tuyo. Ang mga minor, senior citizen ug may balatian ang gidid-an sa paggawas tungod sa ilang sitwasyon. Ug kini ang suportado usab sa Sangguniang Panlalawigan, mga mayores ug nila Senador Manny ug Congressman Ruel Pacquiao.
Anaa sa gihapon sa community quarantine maong dapat walay magkumpyansa. Gipaabot na lang karon ang resulta sa ikaupat (4th) nga swab test sa negosyante taga-General Santos City human subling nag-positibo kini sa Coronavirus. Samtang, aduna nay labing una nga nag-positibo sa COVID-19 sa katapad nga munisipyo sa Malita, Davao Occidental. Aduna puy barangay ang gi-lockdown karon sa Lambayong, Sultan Kudarat gumikan sa suspected cases.