Gikatakdang ipatawag karong semanaha sa kadagkoan sa dakbayan sa Sugbo ang mga tag-iya sa mga club ug bars sa siyudad aron pahinumduman kini sa ilang obligasyon pag-abag sa mga otoridad sa pagsumpo sa pagkatap sa illegal drugs.
Si Cebu City Councilor David Tumulak kinsa kasamtangan usab nga Deputy Mayor on Police Matters nagkanayon nga ilang dapiton ang mga club owners sulod niining semanaha aron tuki-on ang posibleng mga lakang pagsanta sa pagkatap sa illegal drugs ilabi na ang gitawag og party drugs.
Gikabalak-an sa kadagkoan sa dakbayan sa Sugbo nga posibleng mokatap ang mga party drugs gumikan sa nagsingabot nga kasaulogan sa pasko ug bag-ong tuig ug usab ang umaabot nga Sinulog festival sa Enero 2019.
Gipasabot ni Tumulak nga kinahanglan gyod nga motabang ang mga club owners sa kapolisan pag-monitor sa ilang mga clubs aron masanta ang pagpamaligya sa mga party drugs ug uban pang matang sa illegal drugs.
Gi-awhag usab ni Tumulak ang kapolisan nga doblehon pa gyod ang intelligence gathering niini aron masikop ang mga drug peddlers.
Samtang, ang Cebu City Police Office (CCPO) gikatakdang mopasaka karong adlawa sa mga sumbong kalapasan sa Comprehensive Dangerous Drugs Act of 2002 (R.A. 9165) batok sa nasikop nga beauty pageant contestant nga si Teri Marina Colmenares, 22 anyos ug ang kauban niini nga si Nicole Allan Casino, 24 anyos gumikan sa illegal possession and trading sa high grade marijuana ug party drugs.