Si Konsehal Reuben Daba, chairman sa komite sa blue ribbon and ethics, nangusog nga mahatagan sa hazard pay ang mga empleyado sa gobyerno nga nagtrabaho taliwala sa gisagubang nga pandemya dala sa Covid 19.
Kini ang unod sa special report sa konsehal sa sesyon sa konseho niadtong Lunes nga gidumala ni Bise Mayor Kikang Uy.
Gibutyag ni Konsehal Daba nga adunay administrative order nga giluwatan si Presidente Rodrigo Duterte niadtong Marso 2020 nga nagmando paghatag og Covid 19 Hazard Pay sa mga empleyado sa gobyerno nga gitugutan pagtungha sa ilang trabaho taliwala nga gipaubos sa Enhance Community Quarantine (ECQ) ug Modified Enhanced Community Quarantine (MECQ) ang ilang mga lugar.
Matod ni konsehal Daba nga segun sa maong order, mahimong makadawat ang tanang empleyado sa gobyerno ma permanent, casual, contractual ug job order man ang estado sa ilang pagpanarbaho.
Gipasabot sa konsehal nga dili ikalimod ang kalisod sa mga empleyado diha sa ilang pagserbisho tungod kay ang gobyerno dili mahimong mohunong sa operasyon bisan paman og anaa ang hulga sa pandemya.
Nanghinaot si Daba nga masuportahan ang iyang sugyot tungod kay kini nahilatid man sa probisyon sa maong order.
Niini giduso ni Bise Mayor Kikang ang special report ni Daba ngadto sa komite sa finance ubos ni Konsehal Edna Dahino alang sa dugang pagtuon ug rekomendasyon.
(Sangguniang Panlungsod)