Cebu City – Gihagit sa usa ka climate justice group ang kadagkoan sa Sugbo nga ipadayon ang pakisusi sa pagda sa 3,500 ka tonelada sa dinugmok nga dolomite rocks gikan sa Alcoy ngadto sa kaulohan aron iabuno sa baybayon sa Manila Bay.
Sumala pa sa grupo, ang pagpasalig pagtuman sa regulasyon dili katarongan aron undangon ang ibestigasyon sa maong kalihokan.
Sa sayo pa, ang Mines and Geosciences Bureau o MGB VII mitataw nga nakatuman ang kompaniya sa mga requirements ug regulations.
Apan alang sa PMCJ o Philippine Movement for Climate Justice, nagpabiling kuwestiyon kon gi-practice ba ang pagseguro sa environmental sustainability gawas sa pagtuman lang sa bureaucratic process.
Ang coordinator sa PMCJ Cebu, Teody Navea, miingon nga nagpakabana lang sila sa pamaagi sa pag-isyo sa permit sa maong matang sa kalihokan.
Matod ni Navea, ang maong binuhatan angayng idistansiya sa naandan kay piho nga makadaot kini sa natural resources.
Sa nasayran, ang pag-abuno sa Manila Bay og puti kunohay nga bas apan dinugmok ra diay nga dolomite gikan sa  Alcoy, Cebu, nagsugod sa miaging semana nga nakakabig og atensiyon sa mga grupo nga nagpakabana sa kalikopan. (Jhon Tadlip/ JTY)
(Source: Philippine Movement for Climate Justice)