Compulsory sa entiro Sarangani Province ang paggamit og face mask, ma-surgical mask man kini o improvised mask. Sa Executive Order No. 11 nga gipirmahan ni Governor Steve Chiongbian Solon, dili tugutan nga makagawas sa panimalay ug makaagi sa checkpoint kung walay gisul-ot nga face mask.
Kini ang kabahin sa nagpadayon karon nga “tightened border lockdown” sa matag munisipyo sa tibuok probinsya sa Sarangani ilalum sa Modified Enhanced Community Quarantine human nasabutan sa pito (7) ka mayor kauban sila Governor Steve Chiongbian Solon ug Vice Governor Elmer De Peralta matapos ang report sa Department of Health nga may mga nag-positibo na sa COVID-19 sa mga katapad lugar.
Dungan gihapon kini sa padayong pag-obserba sa stay-at-home policy, physical distancing ug hand washing/hand sanitizing.
Una ng nagpagawas og memorandum si Provincial Health Officer Dr. Arvin Alejandro nag-rekomenda sa panapton nga epektibong gamiton pang-home-made face mask, ug kana mao ang panapton nga cotton ug polyester. Pwede pung tahion pang-face mask ang panapton nga linen ug ang pillow case.
Samtang, sa maong tightened border lockdown, mupatuman ang mga mayor og usa (1) ka adlaw nga total lockdown matag semana aron tagaan og panahon nga makapanglimpyo sa kada lungsod subay sa disinfection drive nga gisugyot sa Department of Health.
Mapasalamaton na lamang nga gipabalo sa Sarangani Provincial Health Office nga wala nay na-admit nga PUI nga taga-Sarangani. Samtang, sa napulo (10) ka swab test nga gipadala gikan sa Sarangani Province, napulo (10) usab niini ang nag-negatibo ang resulta sa Coronavirus human nga ang gipaabot nga resulta sa usa (1) na lang ka swab test ang nahidangat na kagahapong adlawa.
