Epektibo na ang resolusyon nga gipasa sa Sangguniang Panlalawigan sa pag-extend sa pagbayad sa RPT kon real property tax ug business tax nga gina-imposar sa Provincial Government sa Sarangani human pirmado na kini ni Governor Steve Chiongbian Solon. Ang pagbayad ang didto na mahitabo sugod sa bulan sa Oktubre, pagtapos sa unom (6) ka bulan gikan Abril 1.
Segun ni Board Member Joseph Calanao, ang chairman sa SP Committee on Appropriation, ilang gituyo nga gilugwayan ang pagbayad sa RPT ug Business Tax aron duyugan ang mga katawhang Sarangan nga naapektuhan sa krisis nga gihatag sa Coronavirus. Susamang sentimento ang gipadayag ni Acting Provincial Treasurer Eliza Cania. Makapahuway sa pagbayad og buluhisan ang mga residente gumikan sa pirwisyo nga gihatag sa COVID-19.
Ug kini nga lakang ang gitugutan ilalum sa probisyon sa Republic Act No. 7160 kon Local Government Code. Nagpadayon pud ang modified enhanced community quarantine sa tibuok Sarangani Province maong maglisod sa pagsakay ang mga mamayad padulong sa Kapitolyo. Una ng nagmando si Governor Solon nga makagawas lang sa balay kung importante ang tuyo, apan kadtong anaa sa vulnerable sector ang dili na pagawson tungod sa ilang sitwasyon.
Samtang, epektibo napud ang resolusyon nga temporaryong nagpahunong o pag-waive sa pagbayad og laboratory fee kung musulod sa lima (5) ka municipal hospital sa Sarangani Province, apil na ang Sarangani Provincial Hospital.
Sa rason nga tawhanon o humanitarian consideration gumikan sa krisis walay tarong pangita tungod sa gipatuman nga stay-at-home ug physical distancing, giuyunan nila Governor Solon, Vice Governor Elmer De Peralta ug sa tanang board member, sa pagsuporta nila Senador Manny ug Congressman Ruel Pacquiao ug mga mayores, nga undangon usa ang pagpaningil sa tanang laboratory charges ma-inpatient man o outpatient sa bisan unsang balatian.
