Zamboanga del Sur – Aduna nay mas hamugaway nga Emergency Room ang Zamboanga del Sur Medical Center human makumpleto ang renovation sa maong facility nga gibendisyunan adlawng Huwebes, Enero 13.
Gipangunahan ni Father Rolando Rafols ang blessing ceremony ug gitambongan kini mismo ni Governor Victor Yu ug governor’s daughter Victoria Yu kauban sa mga board members sa lalawigan.
Sumala ni Dr. Anatalio Cagampang Jr., chief of hospital sa ZDSMC, nga nagkantidad og P10milyones ang maong renovation project lakip sa bag-o usab nga lawak alang sa dialysis units sa maong hospital.
Si Dr. Agnes Fernando sa Department of Health Provincial Office mibutyag nga ang maong proyekto gipondohan sa Health Facility Enhancement Program sa DOH nga naglaraw sa pag-improbar sa mga pasilidad ug serbisyo sa mga government hospitals.
Gikalipay ni Gov. Yu ang bag-ong dagway sa ER ug gipasalamatan niya ang DOH sa kanunay niining pagsuporta sa probinsya aron mas mapalambo ang serbisyo medikal sa ZDSMC.
Ang mas gipanindot nga emergency room sa ZDSMC fully air-conditioned na karon ug kumpleto sa mga bag-ong kagamitan ug andam nga moserbisyo sa katawhang Zambosurian.
