Padayon ang rehabilitasyon sa Basagan–Singatong–Sanao Provincial Road sa lungsod sa Katipunan, Zamboanga del Norte, isip kabahin sa mga lakang sa Provincial Government of Zamboanga del Norte (PGZN) pinaagi sa Office of the Provincial Engineer (OPE) aron mapaayo ang mga dalan nga nagsilbing importanteng koneksyon sa mga komunidad sa kabukiran.
Gibanabana nga moabot sa lima ka kilometro ang kinatibuk-ang gitas-on sa dalan kon mahuman ang proyekto. Sa pagkakaron, nagpadayon ang pag-ayo ug pagpalig-on sa dalan nga nagkonektar sa tulo ka barangay nga dugay nang naapektuhan sa pagkadaot tungod sa kanunay nga paggamit ug mga kondisyon sa panahon.
Sumala kang Engr. Ambrocito E. Agura, Area Engineer sa OPE Sub-Office, District 2-A, gisugdan ang rehabilitasyon human namatikdan ang grabe nga pagkadaot sa pipila ka bahin sa dalan. Importante kini nga agianan alang sa mga residente, mag-uuma ug mga negosyante sa kabukiran sa Katipunan.
Gilauman nga pinaagi sa proyekto, mahimong mas hapsay ug luwas ang pagbiyahe sa mga lumulupyo, ilabina sa pagdala sa mga produkto sa agrikultura gikan sa kabukiran padulong sa sentro sa komersyo sa lungsod.
Dugang pa niini, nahuman na usab ang embankment works sa usa ka nadaot nga bahin sa provincial road sa Barangay Patik, Katipunan. Tumong sa maong trabaho ang pagpalig-on sa pundasyon sa dalan ug pagpanalipod niini batok sa kusog nga agos sa tubig nga maoy nakapahinabo sa pagkadaot sa maong lugar.
Ang maong mga proyekto ubos sa pagdumala ug superbisyon ni Engr. Agura ug kabahin sa padayon nga paningkamot sa provincial government nga mapadayon ang pagkaagianon ug kaluwasan sa mga provincial roads nga nagkonektar sa mga barangay ug kabukiran ngadto sa sentro sa lungsod.(IKEN B. GULLEM)
Source: Zamboanga del Norte Provincial News Network