Zamboanga del Sur – Nangalisang ug naalarma ang mga residente sa lungsod sa San Pablo, Zamboanga del Sur dihang subli na usab nga miatake ang mesteryosong ero nga mikunis-kunis sa binuhing mga kahayopan.
Sa impormasyon nga gitunol ni Angel Balansag, ulahing biktima ang ilang unom ka mga ka binuhing mga kanding nga gihabhab sa tulo ka mga ero dihang gitigway sa hilit nga bahin sa sitio Lambayongan, Barangay Boton, San Pablo niining probinsya.
Niadtong domingo matud pa sa hapon nahitabo ang insidente sa pag-atake sa tulo ka dagkong mga ero nga nakita mismo sa pipila ka residente sa lugar apan wala madakpi gumikan sa kaabtik ug kaidlas niini.
Nahurot pagkamatay ang unom ka kanding nga pulos gipangbusdikan ang tiyan ug gani nawala na ang pipila ka parte sa lawas.
Nibati na usab og kabalaka ang mga residente sa lugar ug alerto niining panahona pinaagi sa pagtipig sa ilang kahayupan ug kabataan kay wala man sila masayod kanus-a subling moataki ang laaw nga mga ero. (Kenneth Alvin Bustamante)
