Samdan ang usa ka pulis sakop sa Sta Cruz Municipal Police Station human nga nadunggaban sa liog atol sa pagresponde sa lalaking nagdala-dala og hinagiban alas 10:45 Huebes sa gabie, Mayo 16, 2024 sa Purok Papaya, Sitio Lubo, Brgy. Zone 2, Sta. Cruz.
Biktima giilang si PSSg Jirven Tolomoro.
Sa report, miresponde sa lugar si PSSg Jirven Tolomoro kauban si PCpl Ronald Patajo human nakadawat og report nga may lalaking nagdala-dala og hinagiban nga gika-alarma sa mga residente.
Pag-abot sa mga pulis, ilang gisita ang suspek nga nailhang si alyas John, 32-anyos nga nagpuyo sa maong lugar.
Wala nagpatuo ang suspek, sa dihang nakahigayon si PSSg Tolomoro, iyang gibira sa likod ang suspek apan misukol kini og nadunggaban si Tolomoro.
Nakahigayon nasab si PCpl Patajo nga ma-neutralized ang suspek.
Anaa na sa kustodiya sa Sta Cruz Police ang suspek nga mag-atubang og patong-patong nga kaso.
Samtang ginatambalan pa si PSSg Tolomoro sa ospital. (Ernest Villariza)