Mosuma-total P1.5Milyones nga kantidad sa illegal nga droga ang gisunog sa Philippine Drug Enforcement Agency Regional Office IX ning adlawng Huwebes, Agosto 8 sa Libertad Power and Energy Corporation, Barangay Libertad, Aurora, Zamboanga del Sur.
Gi-disposed ang mokabat sa 222.4526 nga gramo sa shabu pinaagi sa gitawag og thermal destruction gamit ang kainit nga 800 degrees Celsius, subay sa gilatid sa Section 6 sa DDB Regulation No. 1, Series of 2002.
Ang nasangpit nga mga droga nakolekta gikan sa Regional Trial Court, 9thth Judicial Region, Branch 30, sa Aurora, Zamboanga del Sur, resulta sa gipahigayong anti-drug operations sa PDEA ug PNP sa mga probinsya sa Zamboanga Peninsula. Ang maong aksyon gihimo ilawom sa court order for destruction pinaagi ni Presiding Judge Analyn F. Ramas-Costanilla.
Gisaksihan ang maong seremonya sa mga heads of offices ug representatives gikan sa DOJ, PAO, PNP Crime Laboratory, PNP personnel gikan sa ZDSPPO, Civil Society Organization, EMB, mga Local Officials, LPEC personnel and staff, PIA ug mga miembro sa media.
Nagpasalamat si PDEA-9 Regional Director Maharani Gadaoni-Tosoc sa kolaborasyon kauban ang LPEC sa pagpanguna sa Presidente niini nga si Joseph Kim Cabardo Yu nga nagpagamit sa pasilidad aron mahimo ang drug destruction.
Gidayeg usab ni Gov. Victor J. Yu ang maong lakang sa PDEA nga gipahigayon mismo dinhi sa probinsya uban ang dakong suporta sa Provincial Government sa gihingusgang anti-drug campaign sa gobyerno.
(Source: Victory Zamboanga del Sur)