Dumingag, Zamboanga del Sur – Mokabat sa napulo (10) ka mga vintage bomb nga giilang bala sa mortar ang nakaplagan sa tugkaran sa usa ka balay ning adlawng Biernes, Marso 18, sa Purok Kampo, Brgy. New Basak, Dumingag, Zamboanga del Sur.
Sumala sa report nga samtang nagbugkal sa yuta ang mga trabahante sa himuonong koral sa usa ka balay, adunay silay nakita nga daw puthaw nga ilang nakalutan apan sa dihang ila na kining gikuha ilang nasayran nga usa diay kini ka klase sa vintage bomb.
Human maalarma sa maong nadiskubreng butang, gisumbong gilayon kini ngadto sa kapulisqn ug girespondehan gilayon ug gipaundang ang maong mga trabahante sa pagkalot.
Matud pa ni Nanay Aurea Dalagon, lumad nga residente sa maong dapit ug mismong tag-iya balay nga gikoral, posibleng ang maong mga bomba panahon pa kini kaniadto diin gihimo ang maong lugar nga kampo kasundalohan.
Samtang ning adlawng Sabado, gisusi sa PNP kauban ang grupo sa EOD kun Explosive Ordnance Disposal ang maong dapit kung wala naba’y laing bomba nga natabunan sa lugar. Sa ilang pag-imbestigar aduna pa silay usa nga nakaplagan hinungdan nga nahimo ng onse (11) kabuok tanan ang narekuber nga bomba.
Anaa na sa kustodiya sa kapulisan ang maong mga item alang sa pagahimuong detonation. (Marlon P., photos courtesy of Media Press Release)