Zamboanga del Sur – Mukabat na sa 320 ang kinatibuk-ang ihap sa mga Wi-Fi sites nga nainstalar ug napahimuslan sa mga kalungsuran sa Zamboanga del Sur ilawom sa programang Victory Free Wifi sa kagamhanang probinsyal.
Segun sa Communication and Information Systems Office Head nga si Justin Paolo Herrera, 51 sa maong mga wifi sites ang nataud sa Pagadian City samtang 169 ang gikan sa kalungsuran, 53 ang gikan sa ubang pampublikong lugar ug 47 ang gikan sa remote APs/relays.
Sa pinakaulahing datos, natala sa buhatan sa CISO ang 60,953 ka mga unique users nga nakagamit sa libreng wifi diin 8,000 niini ang average active daily users ug dili muubos sa 1,800 ang concurrent users.
Ang programa sa libreng wifi namugna tungod sa inisyatiba ni Governor Victor Yu ug Deputy Speaker Divina Grace Yu sa katuyoan nga makatabang ilabina sa mga estudyante sa kabaranggayan sa panahon sa pandemya diin migamit sa modular ug online learning ang mga tulonghaan.
Nahimong malampuson ang installation sa nasangpit nga libreng wifi pinaagi sa technical team sa CISO ug sa suportang teknikal sa Department of Information and Communications Technology (DICT).
(Source: ZDS Press Bureau)