Zamboanga del Sur – Mas gihingusgan karon sa kagamhanan kaabag ang mga partner agencies ang kampanya batok sa smuggled cigarettes pinaagi sa mga orientasyon dili lamang sa municipal level apan hangtod na sa mga barangay dinhi sa lalawigan.
Atol sa launching sa barangay information officers network sa lungsod sa San Miguel adlawng Mierkules, nalakip sa mga importanteng kasayuran nga gipaabot ngadto sa mga BIO’s mao ang dili maayong epekto sa ekonomiya tungod sa pagkuyanap sa smuggling ilabina sa pekeng sigarilyo dinhi sa Zamboanga Peninsula.
Sumala ni Richard Hart Paragas, representante sa Philippine Tobacco Institute, mokabat sa 30 bilyones ka pesos matag tuig ang nawala sa kagamhanan tungod sa pagkuyanap sa mga iligal mga sigarilyo diin ang buwis niini maoy igahin unta sa mga programa sa Universal Health Care sa nasud.
Tungod niini, nakigkutay ang ilang buhatan ngadto sa local government units pinaagi sa pag-awhag sa barangay information officers sa pagreport kung adunay maong iligal nga binuhatan sa ilang lugar.
Nasayran nga nag-una ang Rehiyon 9, 10 ug BARMM nga may pinakataas nga insidente sa illegal cigarette trade sa tibuok nasud nga miabot og 31.8%.
Ang kagamhanang probinsyal sa Zamboanga del Sur mipasar na og Provincial Ordinance No. 051-2021 nga nagmugna og usa ka Task Force ning milabayng tuig aron sumpuon ang cigarette smuggling dinhi sa probinsya. Kahinumdoman nga milyones na nga kantidad sa iligal nga sigarilyo ang nasakmit sa probinsya pinaagi sa managsunod nga operasyon sa NBI, PNP ug Bureau of Customs.
Ang BOC naghinaut nga pinaagi sa hiniusang pwersa sa mga national agencies lakip na ang kooperasyon sa katawhan, makuha og balik ang angay nga excise tax sa mga tobacco products aron masuportahan ang universal health care program sa kagamhanan.
(Source: ZDS Press Bureau)