Zamboanga del Sur – Pagasugdan na sa dili madugay ang konstruksyon sa bag-ong building sa Department of Interior and Local Government Zamboanga del Sur Office human malampusong gipahigayon ang ground breaking niini sulod mismo sa Dao Provincial Government Center adlawang Martes, Abril 12, 2022.
Ang maong 2-andanas nga edipisyo nagkantidad og ₱ 6.3 milyones ug gilaumang matapos sulod sa 180 calendar days.
Mitambong sa maong seremonya ang mga regional ug provincial officials sa DILG sa pagpanguna ni DILG-9 Regional Director Paisal Abutazil, ug Provincial Director Moh Taha Arakama.
Pinasidungang bisita sa mahinungdanong kalihukan si Governor Victor Yu ug Deputy Speaker Cong. Divina Grace Yu kauban ang pipila ka mga board members og provincial office heads.
Mipadangat sa iyang dakong pasalamat si DILG-9 RD Abutazil ngadto kang Gov. Yu ug sa provincial government tungod sa pagdonar niini og lote aron tukuran sa maong building.
Giisip sa mga personahe sa ahensya nga dako kining katumanan sa ilang dugay ng pangandoy aron makabaton og hamugaway ug kaugalingong buhatan dinhi sa probinsya.
“Ang pagtukod sa provincial office nahisubay sa pinakamaayong interes sa mga gialagaran sa buhatan diin nagsunod kini sa mandato sa ahensya nga nagkanayon “Matino, Mahusay, at Maasahan”, segun ni Provincial Director Arakama.
(News & photo courtesy of ZDS Press Bureau)