Zamboanga del Sur – Nagmalampuson ang gipahigayon nga blessings og pagturn-over sa mga Makinarya nga Pang-agrikultura gikan sa Philippine Center for Postharvest Development and Mechanization kon PhilMech ngadto sa mga Farmer’s Cooperative sa nagkalain-laing lungsod sa Zamboanga del Sur, karung adlaw nga huwebes sa may Subanen Hall, Dao Pagadian City.
Todo usab ang gihatag nga suporta ni Governor Victor J. Yu sa maong programa, tungod kini alang sa mga katawhan nga mas makahatag pa og ikatabang sa ilang pang-adlaw-adlaw nga panginabuhian. Isip pagsuporta ang nahisgutan nga aktibidad gitambungan usab ni Vice Governor Roseller Ariosa, mga Board Members sa Zamboanga del Sur, anaa usab ang Youth Movement President nga si Victoria Yu, Atty. Jackie Bana ug mga personahe sa Department of Agriculture, PhilMech ug representante ni Senator Cynthia Villar, og ni Robert Christian Villacura.
Naangkon sa mga Farmers’ Cooperative ang mga makinarya nga gilangkoban sa 4 ka wheel tractors, 24 ka unit sa Hand Tractor, 3 ka unit sa Float-assist Tiller, 13 ka unit sa PTO Driven disc Plow/Harrow, 4 ka unit sa Precision Seeder, 1 ka unit sa Walk behind transplanter, 1 ka unit sa Riding type transplanter, 1 ka unit sa Reaper, 2 ka unit sa Rice Combine, 17 ka unit sa Rice Thresher, 19 ka unit sa Mechanical dryer, og 4 ka unit sa Impeller rice mill.
Dako ang pagpasalamat sa mga Farmer’s Cooperative sa Lungsod sa Mahayag, Labangan, Ramon Magsaysay, Tukuran, Aurora, Sominot, Molave, Tambulig, ug Dumingag sa Unang Distrito, Bayog, San Pablo, Dumalinao, Guipos, Tigbao, Kumalarang, Dimataling ug Lakewood, og sa Pagadian City, nga maoy nahimong recipients niini, ngadto sa PhilMech ug kang Governor Yu, tungod usa kini ka dakong tabang alang kanila.
(News & photos courtesy by Wendel Cabrera)
