Dead on arrival ang duha ka mga biktima samtang isa usab ang kritikal human nalambigit sa panagbangga sa usa ka motorsiklo ug Elf truck sa Purok Pajo, Poblacion, Pitogo, Zamboanga del Sur kaganihang alas 5:15 sa hapon, Abril 12, 2024.
Giila ang mga biktima nga nakabsan sa kinabuhi nga sila si:
1. Argie M. Layar, 27 anyos, ulitawo, mag-uuma, driver sa motor ug lumulupyo sa Purok Papaya, Sitio Liong Barangay Poblacion, Pitogo, ZdS.
2. Shilphie Rey Y. Bustamante, 13 anyos, estudyante, ug residente sa Purok Papaya, Sitio Liong Poblacion, Pitogo.
Samtang, anaa usab sa talandugon nga kahimtang si Jay L. Diana , 15 anyos, estudyante ug lumulupyo sa Purok Papaya Sitio Liong, Barangay Poblacion Pitogo.
Subay sa inisyal nga taho, samtang sakay ang mga biktima sa usa ka motorsiklo nga Euro Sport R 125 nga gimaniho ni Argie M. Layar uban ang duha niini ka mga angkas nga sila si Shilphie Rey Y Bustamante ug Jay L. Diana, kusog matud pa ang dagan sa motorsiklo hinungdan nga nawad-an ug kontrol ang driver niini ug aksidenteng nibangga sa usa ka Isuzu Elf truck nga gimaneho ni Junrey Cadalenza Lumactod nga gikan sa Barangay Panubigan.
Tungod sa kakusog sa impact, nalagpot ang mga biktima ug nakaangkon ug mga grabeng samad sa kalawasan.
Nadala pa sa balay tambalanan ang driver sa motorsiklo ug isa pa ka angkas niini apan gideklara kining dead on arrival samtang swerte nga naluwas ang isa pa ka angkas niini nga padayon pang gipailalom sa medikasyon.
Wala ra usab naunsa ang driver sa Elf truck ug niining kasamtangan nagpadayon pa ang gihimong imbestigasyon sa mga awtoridad labot sa nasangpit nga panghitabo. (Ernest Villariza)
