Cebu City – Masalbar ang gihulagway nga “oversupply” sa mga utanon sa Lungsod sa Dalaguete, Lalawigan sa Sugbo nga naka apekto sa halin sa abot sa mga mag-uuma.
Kini human mipasalig si Governor Gwendolyn Garcia ngadto kang Mayor Jeffrey Belcina nga ang kagamhanan sa lalawigan motabang pinaagi sa pagpalit sa mga utanon niini.
Kagahapon, Abril 22, atol sa pagbisita ni Garcia sa maong lungsod, gipahibaw niya nga ang Kapitolyo mo kompra sa mga utanon ug i donate kini ngadto sa mga charitable institutions.
Sa iyang bahin, gibutyag sab ni Belcina ngadto sa gobernador nga mipahigayon sila ug community pantries nga manghatag ug libreng utanon sa mga molopyo.
Samtang gipahibaw ni Department of Agriculture Executive Director-Region 7 Salvador Diputado nga dunay mga mag-uma nga inutang ang ilang ponohan sa pagtikad.
Matod ni Diputado nga duna silay programa nga maka tap ug buyer sa maong mga produkto.
Pipila ka adlaw, nasinate sa mga mag-uuma sa Dalaguete ang daghan nga supply, partikular na sa repolyo nga misangpot sa pag us us sa presyo.
Ang matag kilo sa repolyo gibaligya sa tag P6 kadtong matawag nga first-class, samtang tag P4 kada kilo ang “reject”.
Gani, dunay panawagan ngadto sa mga nagpahigayon ug community pantry nga adto mokoha ug mga utanon aron lang makatabang sa sitwasyon.
Agig tubag, ang Cebuano Youth Ambassadors, Inc ug SK sa Barangay Mantalungon nag collaborate alang sa ilang unang Vegetable Rescue Operations.
Sud lang sa usa ka oras, ang team naka tigom ug P5,000 pag rescue sa 1000 kilo nga repolyo ug ipang-apod apod ngadto sa mga community pantries.
Niadtong panahon nga gipatuman ang lockdown, nakasinate sab ug kalisod ang mga mag-uuma dihang ang mga tonelada nilang mga utanon nanga stranded, ug dili maka labang sa Syudad sa Sugbo.
Gi-supply ang maong mga utanon ngadto sa provincial ug city jails, provincial district hospitals ug ubang charitable institutions pinaagi sa Kapitolyo. (Jhon Tadlip/JTY)
(Source: Cebu Provincial Government , photos courtesy by Jhe Caritan Calvo | Rhea May Ambrad)
