Cebu City – Girekomenda sa Cebu City Legal Office ang pag terminate sa empleyado sa City Hall nga nadakpan sa buy bust operation sa Dakbayan sa Lapu-Lapu, kagahapon, Abril 22, 2021.
Matod ni Atty Rey Gealon nga dunay gahum motaktak si Mayor Edgar Labella sa maong casual nga empleyado pinasikad sa civil service laws, rules and regulations isip usa ka casual employee basi sa maong cause.
Kini human madakpi ang Administrative Aide ug na destino sa Department of General Services nga si Robeth Sable de los Santos sa Lapu-Lapu City Police Office alas 6:40 sa buntag, Huwebes, sa Block 4, Lot 8, La Aldea Buena, Barangay Babag, Syudad sa Lapu-Lapu.
Si De los Santos nakuhaan ug 105 gramos nga shabu, mokantidad ug ₱ 714,000.
Gibutyag ni Police Lt. Noah Anana, team leader sa joint operation sa City Intelligence Unit ug Drug Enforcement Unit, anaa sa ilang drug watchlist isip high value individual.
Giingong gigamit sa suspek ang usa ka Innova nga local government sa Cebu City.
Nasayran nga duna nay nahimong kalapasan kaniadto si De los Santos kalabot sa Dangerous Drugs Act of 2002 sa wala pa kini madakpi kagahapon. Â (Jhon Tadlip/JTY)
(News & photo courtesy of Cebu City Public Information Office)
