Mandatory nga mupirma sa contact tracing form (CTF) ang tanan nga mosulod sa dakbayan sa Dabaw. Kini human giaprobahan sa 19th Davao City Council ang ordinansa nga ginatawag na “An Ordinance For The Mandatory Submission Of A Health And Other Emergencies Contact Tracing Form For All Persons Entering Davao City By Land, Air Or Sea” niadtong Miyerkules Santo, Abril 9, 2020.
Sumala ni Dr. Mary Joselle Villafuerte, proponent ug chairperson sa Committee of Health sa konseho, tumong sa maong ordinansa nga mas mapadali ang pagcontact sa usa ka indibidwal ilabi na sa iyang gigikanan lakip na dinhi ang personal data, contact details, travel history ug medical information aron nga mapugngan ang pagkuyanap sa sakit sama nalang sa coronavirus disease (COVID-19).
Unod sa pirmahan nga contact tracing form ang mosunod: date of arrival; full name; nationality; age; sex; birth date; flight number, bus company and bus number, or vessel name; name of hotel or address in Davao City (if applicable); residence in the Philippines; Philippine mobile number; and e-mail address.
Ipaniguro sab nga ang tanan impormasyon nga makolekta magpabilin nga pribado ug confidential ingon man gamiton lang atol sa contact tracing nga pagahimuon.
Ang musupak sa maong ordinansa, mamahimong mamultahan og singko mil (5,000) pesos o dili ba kaha masilotan og pagkabilanggo sa dili musobra sa usa ka tuig o dili ba kaha pulos ipahamtang ang maong mga silot depende sa mando sa korte.