Nagpadayon ang paglambo sa sektor sa agrikultura sa lalawigan sa Misamis Oriental gumikan sa walay puas nga suporta sa buhatan sa Provincial Agriculture Office (PAGRO) nga gidumala ni Mr. Jose Apollo Pacamalan.
Karong bag-o nakabisita sa Oolong Tea Processing Plant sa Barangay Kalagonoy, Gingoog City ang kooperatiba sa First Community Cooperative (FICCO) ug ang Millalittra Farmers Agricultural Cooperative (MILFACO).
Ang MILFACO usa ka kooperatiba nga nakabase sa Talakag Bukidnon nga gilangkuban sa mga IP farmers aron sa paglantaw sa maong planta sa Oolong tea dinhi sa lalawigan ug nahimo nilang sukaranan ang maong plantasyon.
Samtang ang FICCO nangita og usa ka potensyal nga kauban sa kalambuan ug naglaraw nga mapalapdan ug matabangan nga mapauswag ang industriya sa Oolong tea sa probinsya pinaagi sa paghatag og pondo sa mga lokal nga mag-uuma.
Mibisita usab sa strawberry plantation ang mga Board of Directors ug Staff sa Ficco ug mga miyembro sa IP farmers sa susamang lugar ug barangay kauban si Provincial Agriculturist Jose Apollo Pacamalan.
Malaumon ang mga lokal nga mag-uuma sa lalawigan sa kalambuan nga natagamtaman ug matagamtaman pa sa umaabot sa industriya sa Oolong tea sa lalawigan tungod kay nakita nila ang dakong suporta ni Governor Bambi Emano ngadto kanila.
Tinguha sa amahan sa lalawigan nga mahatagan og kahamugaway ug kaarangan nga kahimtang ang mga mag-uuma partikular na sa Oolong tea kay dako ang potensyal niini sa pagpauswag dili lamang sa ekonomikanhong kalamboan sa mga mag-uuma apan kalamboan usab sa lalawigan sa Misamis Oriental gumikan kini lamang ang nag-inusarang plantasyon dinhi sa nasod sa Pilipinas.
(Provincial Information Office – MisOr)