Cebu City – Gitataw sa Department of Health o DOH 7 nga kinahanglan pang agnihon ang mga edaran nga magpabakuna batok sa covid 19 sanglit 7.3 porsyento pa lang sa tanang registered senior citizens sa rehiyon ang nakadawat sa first dose sa bakuna.
Suma pa sa tigpamabasa DOH 7, Dr. Mary Jean Loreche, hangtod sa miaging adlaw, miabot lang og 44,120 sa 604,444 ka rehistradong senior citizens ang nakadawat sa unang shot sa Covid-19 vaccine ug 5,079 ang kompleto na.
Sa kabahin sa mga medical front-liners ubos sa A1 priority, 96,140 sa 131,781 o 73 porsyento sa total A1 priority population ang nadapatan sa first dose samtang 50,272 ang second dose.
Miabot usab og 16,168 sa 65,537 ka persons with comorbidities ubos sa A3 priority ang nadapatan sa first dose ug 1,509 ang kompleto na.
Samtang ang Project Balik Buhay (PBB) naka-immunize na og first dose sa 488 ka medical front-liners, 1,955 ka senior citizens ug 4,405 ka tawo nga adunay laing sakit sa Cebu.
Gawas niana, nakadapat usab ang PBB og second dose sa bakuna sa 186 ka medical front-liners, 939 ka senior citizens ug 1,086 persons with comorbidities. (Jhon Tadlip/JTY)
(Source: Department of Health 7, photo courtesy of Cebu City Public Information Office)
