29.6 C
Manila
Friday, April 19, 2024

Offshore Faults Sa Davao Area Gina-Monitor Sa Phivolcs Samtang Pdrrmo Sarangani Padayong Nagpahimangno Sa Epekto Sa La Niña Phenomenon Hangtud Pa Bulan Sa Marso

- Advertisement -

Gibutyag ni Ms. Nane Danlag, ang Science research assistant sa Philippine Institute of Volcanology and Seismology kon PHIVOLCS naka-basi sa dakbayan sa Heneral Santos nga gina-monitor sa ilang ahensya ang katapad nga area sa Davao Region nga tinubdan karon sa mga paglinog.

Daghan ang nabalaka sa sunod-sunod nga pagtay-og sa bandang Davao Occidental nga gapatay-og usab sa probinsya sa Sarangani, Gensan ug ubang parte sa Mindanao. Gani, sa linog nga nahitabo atong niaging semana, Enero 21 sa gabii, nabatyagan pa kini sa pipila ka mga lugar sa isla sa Visayas, sama sa  Samar ug Eastern Samar, dili lang sa Mindanao tungod sa gikusgon.

Segun ni Danlag, padayon pa kining ginasubay sa PHIVOLCS. Apan sa inisyal nilang pagtuon, naay mga offshore fault matud pa ang anaa ilalum sa kadagatan sa mga kasikbit lugar lahos na sa munisipyo sa Governor Generoso, Davao Oriental. Offshore Fault tungod extension kini sa mga fault line sa malang bahin ngadto sa kadagatan.

Gikonsidera ni PHIVOLCS Director Undersecretary Renato Solidum nga major earthquake ang mao nga pagtay-og sa may Jose Abad Santos, Davao Occidental tungod niabot kini og 7.1 magnitude. Apan gumikan sa gilawmon sa tinubdan sa linog anaa sa 111 kilometers depth, wala kini nakatala og dakong damyos.

Matud pa ni Mr. Rene Punzalan, ang provincial disaster risk reduction and management officer  sa Sarangani Province, kung nidugay ang maong linog, sigurado matud pa nga dagkong damyos ang madangatan.

Walay laing pahimangno ang PDRRMO Sarangani ilalum sa Sulong Kaligtasan program ni Governor Steve Chiongbian Solon kuyog sila Senador Manny ug Congressman Ruel Pacquaio, Vice Governor Elmer De Peralta, tanang board member, pito (7) ka mayor ug mga municipal-barangay disaster officer and rescuers ug ang PHIVOLCS Gensan kundili seryosohon ang ginapahigayon matag quarter nga earthquake drill aron dili mag-panic sa aktwal nga panghitabo.

Pirme nang ginabalik-balik sa PDRRMO ug mga MDRRMO ang Duck, Cover and Hold. Inay mataranta samtang galinog, gunitan dapat ang ulo ug hinanaling mangita og kasalipdan, kaysa mag-panic ug magdagan-dagan.

Samtang, sa pikas nga bahin, gipamahayag sa PDRRMO Sarangani nga ang mga nasinatian nga mga pag-ulan ang epekto sa La Niña phenomenon. Segun ni Punzalan, mulungtad kini hangtud 1st quarter karong tuiga 2021 subay sa report sa PAG-ASA. Nagsugod ang La Niña gikan pa Oktubre niaging tuig ug muhangtud sa Marso karon nga tuig. Nakasinati matud pa ang nasud og mga weather disturbance, ang Intertropical Convergence Zone/ITCZ, Low Pressure Area ug Hanging Amihan.

Padayong gipa-igmat ang mga katawhan sa mga pagbaha, landslide ug ang mga sakit nga binitbit sa mga ulan-ulan, sama sa dengue ug diarrhea. Pirme managana dili lang sa Coronavirus kundili sa mga balatian nga manggawas panahon sa ting-ulan.

Walay swerte ang batang babae syete (7) anyos ang edad nga naanod sa sapa sa Kablacan, Maasim niaging mga adlaw, didto na kini nakit-an sa dagat nga wala nay kinabuhi. Bantayanan ang mga kasapaan ug kadagatan tungod kalit lang gamaot ang panahon, maong dili gyud magkumpyansa.

- Advertisement -

Leave a Reply

- Advertisement -

Related Articles

- Advertisement -
- Advertisement -

Latest Articles

- Advertisement -