Wala mabalaka si Gob. Gwendolyn Garcia nga napu nalang sa 50 ka lungsod ug siyudad sa lalawigan ang Covid free.
Suma pa ni Garcia, wa matandog ang Kapitolyo sa maong report sanglit maoy ilang gitutokan ang pagpahiuli sa ekonomiya sa probinsiya nga naguba sa milabayng tuig.
Matod niya, mabalaka lang sila kon ang mga ospital ug isolation centers mapuno na sa masakiton ug matawag na og overwhelming.
Pagkakaron, base sa report, 20 porsyento lang sa upat ka provincial hospitals ug 13 porsyento sa 12 ka district hospitals ang okupado busa aduna pay 87 porsyento nga bakante.
Midugang si Garcia nga naay daghang paagi nga mapugngan ang pagtakod sa virus nga anaa ra sa balay lakip na ang kontrobersiyal nga tuob.
Nagkanayon siya nga aron pagpalig-on sa immune system, mas maayong moinom og lemonsito nga may turmeric, motomar og vitamin C with Zinc ug makigbisog batok sa COVID ug ubang sakit.
Alang sa gobernador, ang 5 porsyento nga pagsaka sa mga kaso sa virus sa miaging buwan o kinatibuk-ang 537 ka aktibong pasyente, dili kaayo kabalak-an kon itandi sa kahimtang sa ekonomiya sa kalungsoran ug mga siyudad. l via Jhon Tadlip/JTY
Source: Cebu Provincial Government
Photo: Gov. Gwen Garcia FB
