Walay gitugtan nga makasulod o gawas sa Zone 9, Phase 1, Sitio Macanhan, Barangay Carmen ning dakbayan sa Cagayan de Oro tapos mipagula sa executive order niadtong Lunes si Mayor Oscar Moreno aron makafocus sa pagpahigayon sa containment sa maong lugar. Ang mga authorized persons outside of residence (Apor) ug kadto lamang kinahanglan nga mogawas alang sa strikto nga gikinahanglang katuyuan ang gitugtan sa pagbiya sa ilang mga pinuy-anan. Apan kadtong ubos sa 21 anyos ang pangidaron ug 60 anyos pataas ang gidid-an pagbiya sa ilang pinuy-anan.
Ang kamanduan gihimo tapos sa bag-ong kaso sa Covid-19 nga nag-apil na sa 59 anyos nga babaye nga residente sa Macanhan, barangay Carmen ug silingan sa unang namatay nga Covid-patient sa maong dapit.
Ang maong babae mao ang ika-14 nga konpirmadong kaso sa syudad ug ika-upat nga Covid-positive person gikan sa Sitio Macanhan.
Ang maong EO naghatag panahaon sa City Health Office uban sa Carmen Barangay Health Emergency Team ug sa Cagayan de Oro City Police Office (COCPO) sa pagpahigayon sa intensive contact tracing and surveillance sa tanang residente sa maong lugar ug nakapa-isolate sa mga tawong adunay Covid-like symptoms.